Roma, shqiptar 23-vjeçar kapet me 200 kg kokainë dhe armë në shtëpi

Një 23-vjeçar shqiptar është arrestuar në Romë pasi në banesën e tij u sekuestruan 200 kilogramë kokainë, një pistoletë, municione dhe rreth 30,000 euro para të gatshme. Sipas mediave italiane, sasia e drogës do të kishte sjellë afërsisht 16 milionë euro fitim për krimin e organizuar.

Droga ishte e ndarë në 191 blloqe me logo të ndryshme, duke u përkthyer në rreth 8,000 doza gati për shitje. Karabinierët raportojnë se droga ishte e destinuar për shpërndarje në rrugët e Romës, me të ardhurat që do të përdoreshin për aktivitete të mëtejshme kriminale.

Zbulimi u bë pas një kontrolli të rastësishëm në rrugë. Policia ndaloi të riun, i cili mbante me vete një shumë të madhe parash që nuk mund të justifikohej, duke çuar në vendimin për të kontrolluar banesën e tij. Sipas karabinierëve, arma e sekuestruar ishte e vjedhur, ndërsa makina e përdorur për transport të drogës ishte e pajisur me një bagazh të fshehtë që hapej me kod.

I riu është dërguar në burgun e Rebibbias, ndërsa hetimet mbi rrjetin dhe origjinën e drogës vazhdojnë.